La pasada fin de selmana, tuviemos l’honor de cuntare cuna presencia en Llión del Doutor Amadeu Ferreira, presidente de l’Associaçon de la Lhéngua Mirandesa. El Master Class d’especialización en Llingua Llïonesa fou’l marcu nel que pudiemos adeprender el procesu de normativización mirandés. El doutor Ferreira, ye una de las presonas que más tiempu lleva lluchandu y trabayandu en favor del Mirandés. Autor de deillos llibros y trabayos de rebúsqueda, apresentóu na nuesa capital ‘Mirandés, Stória dua lhéngua i dun pobo’, que ficiera xunta José Rui.
El Mirandés, que xurde de la llingua llïonesa, fou reconocíu oficialmente pur Pertual en 1999. Guei ensíñase nas escuelas y tien feichu un desenvolvimientu curiosu n’asiñalare la toponimia y las cais de la Tierra de Miranda.
Miranda ye una rexón especial pa cualisquier llïonés. La nuesa llingua, la nuesa cultura, las nuesas costumes y la nuesa vida d’a diariu respíranse en caúna de las suas casas, de los sous pueblos, de los sous montes.
Cuandu vamos a Miranda, cuandu vamos al Distritu de Bregancia, nun cruzamos llinde denguna. De poucu val qu’eillos tengan un pasaporte distintu al nuesu. De poucu val que nos separtaran cuantayá en dous estaos diferentes. De poucu val que nos digan que nun formamos parte d’una misma alministración. Pensamos igual, vivimos igual, falamos igual. Poucu importa que la sua grafía tea apertuesada y la nuesa acastellanada.
Cuandu sonan las pallabras, cuandu miramos pa las tradiciones, somos iguales, somos un mismu pueblu. Y a los pueblos, pur mueitas llindes artificiales que nospongan, pur mueitos nomes nuevos que quierandanos, nun se nos cambia d’un día pa outru. Miranda, heredeira de la cultura llïonesa, diera un pasu p’alantre pa conservala y nun ta dispuesta a arrenunciar a la sua llïonesidá. Lu que faigamos nosoutros d’esti llau de la llinde, el futuru que queramos pal pueblu llïonés, pa la llingua llïonesa, ye dalgu que, necesariamente, pasa pur averanos al Distritu de Bregancia, a la Tierra de Miranda.
Abel Pardo Fernández es viceportavoz del Grupo UPL en el Ayuntamiento de León
Excepcionalmente y atendiendo a la celebración del Festival de Cine Histórico, la columna del concejal de UPL se publica en llïonés
